NAZIONALE SARDA DI RUGBY, ESORDIO E VITTORIA

chenàbura 15 de làmpadas de su 2012

Natzionale sarda de rugby, esòrdiu e vitòria

10 giugno 2012 19:52   
Gianni Muroni

S'Alighera - Sàbadu 9 de làmpadas su campu de Maria Pia est istadu teatru de un'eventu istòricu: sa prima partida de sa natzionale sarda de rugby, cumposta dae giogadores de S'Alighera, Cabuderra, Terranoa, Sìnnia, Thàthari e Nùgoro. At organizadu s'Amatori Alghero, cun sa collaboratzione de sas àteras iscuadras sardas e de su comitadu rugbìsticu sardu.
Sa formatzione isulana, seletzionada dae Luca Nurra paris cun Marco Bollesan, at giogadu contra a una rapresentativa de 5 iscuadras de Bartzellona.
Sas duas seletziones non sunt reconnotas dae s'IRB, sa federatzione internatzionale, ma, cun s'esecutzione de sos innos, su de Catalugna e Procurade 'e moderare, ant fatu a cumprèndere ca si cherent leare s'ispàtziu issoro in su mundu de sa botza ovale.
Ant bintu sos sardos, 24-12, primu tempus 19-0. Sos catalanos ant marcadu 2 metas in su segundu tempus. Ma galu prus importante de su resurtadu est istadu su clima de amistade e de orgòlliu intre 2 rapresentativas de 2 natziones sena istadu.
Finida sa partida, a pustis de su de 3 tempos, comente est traditzione in su rugby, cun unu cumbidu a giogadores e ispetadores presentes, in su palcu s'organizatzione at mutidu a sos allenadores, a sos coordinadores de sas seletziones e a s'àrbitru de sa partida, s'internatzionale Carlo Damasco. Bollesan, figura istòrica de su rugby italianu, giai tècnicu de sa natzionale tricolore e de s'Amatori Alghero, at presentadu su libru suo Una meta dopo l'altra.
Presente puru Joan Adell, rapresentante de sa Generalitat de Catalugna in S'Alighera. Sos catalanos ant ammentadu ca in sos annos '30, in antis de sa gherra de Ispagna, sa seletzione issoro aiat giogadu 2 partidas, contra a sa Frantza e a s'Itàlia, e ant regaladu a sos sardos sos manifestos de cuddas partidas.
In prus ant manifestadu s'intentzione de organizare unu torneu de sas 4 natziones mediterràneas paris cun Còrsica e Tunisia. At allegradu su postpartida su grupu folk aligheresu La Muralla.
Pro sa Sardigna ant giogadu:
15 Daga, 14 Baire, 13 Garau, 12 Ferrari (Cappai), 11 Solinas (Sanciu), 10 Salis, 9 Ambus (Peana), 8 Sainas, 7 Spanu (Usai), 6 Pinna, 5 Ferrentino (Taras), 4 Paco (Coccolone), 3 Geraci (Micheletti), 2 Spirito (Gabbi), 1 Mele (Bonetti).
Pro sos catalanos:
15 Martínez, 14 Piza, 13 Ocampo, 12 Corominas, 11 Figueras, 10 Benet, 9 Cabonell, 8 Estrada, 7 Ramírez, 6 Brue, 5 Murciano, 4 Franco, 3 Moreno, 2 Vilaseca, 1 Vives; 16 Bohigas, 17 Jimémez, 18 Riera, 19 Graffi. Tècnicu: Benet, paris cun Vázquez e Chica.
Ant marcadu pro sos sardos Mele a su 27°, meta tècnica a su 33° trasformada dae Baire, meta de Baire a su 38° trasformada dae Baire, meta de Sainas a su 65°, pro sos catalanos Martínez e Graffi cun trasformatzione de Benet.